По трагедијата во која животот го загубија 63 млади животи, време е конечно да се постави прашањето — кој контролира што се случува во кафе баровите и угостителските објекти во Кочани?
Секој викенд сме сведоци на забави со бендови, диџеи и стотици гости, во објекти кои не се регистрирани како ноќни клубови и немаат дозвола за таков тип на настани.
Законот за угостителска дејност јасно предвидува дека кафе-баровите смеат да работат до полноќ и не смеат да организираат живи настапи без посебно одобрение и соодветна звучна и безбедносна заштита.
Сепак, на терен состојбата е поинаква — гласна музика, преполни локали без можност за брз излез за евакуација и никакви безбедносни мерки. Општина Кочани и инспекциските служби да реагираат веднаш и да воведат:
• строги контроли на сите објекти кои организираат настани,
• забрана за забави со бендови во објекти без дозвола,
• и редовна проверка на противпожарната и безбедносната опрема.
Без одговорност и контрола, секој викенд може да биде нова потенцијална трагедија.
Време е институциите да покажат дека научиле нешто од болните искуства и дека безбедноста на младите е над партиските и економските интереси.
Надлежните институции да воведат строги контроли и санкции — затоа што ниедна забава не вреди повеќе од еден човечки живот.
