Предлогот за изградба на меморијален парк кај зелената површина до старата зграда, помеѓу улиците „Кеј на Револуцијата“ и „Браќа Ставреви“, предизвика силни реакции во јавноста. Оваа локација беше предложена од страна на родителите на трагично загинатите деца во дискотеката „Пулс“, со цел да се создаде трајно место за сеќавање.
Сепак, дел од граѓаните кои живеат во околината поднесоа петиција со која се спротивставуваат на изградбата на меморијалниот парк на таа локација, барајќи да се најде посоодветно место кое нема да го наруши секојдневието и просторот за живеење.
Полемиките и спротивставените ставови продолжуваат да се шират на социјалните мрежи, каде што граѓаните изнесуваат аргументи „за“ и „против“, отворајќи поширока дебата за тоа како и каде треба да се одбележи оваа трагедија на начин што ќе биде прифатлив за сите.
