Последните надојдени води уште еднаш јасно го покажаа сериозниот и долгорочен проблем со коритото на Кочанска Река. Секој посилен дожд е доволен за да се создаде страв кај граѓаните, особено кај жителите на селата и населбите покрај реката, кои со години живеат во неизвесност и ризик.
Наместо привремени и козметички интервенции, сосема оправдано се поставува прашањето: зошто не се пристапи кон целосно чистење, уредување и проширување на критичните делови од текот на Кочанска Река? Коритото на многу места е затрупано, обраснато и стеснето, што директно го зголемува ризикот од излевање и поплави.
Потребно е системско и темелно решение – по целата должина да се изврши расчистување, да се изградат соодветни потпорни ѕидови, насипи и заштитни конструкции кои ќе обезбедат сигурност и стабилност. Ова не е луксуз, туку основна инфраструктурна потреба и прашање на безбедност.
Уредувањето на реката мора да биде приоритет за локалната и централната власт, затоа што станува збор за доброто на сите – заштита на домовите, земјоделските површини, инфраструктурата и, најважно, човечките животи. Секое одложување значи нов ризик и нова опасност.
Кочани и околните села заслужуваат навремени, одговорни и долгорочни решенија. Проблемот е познат, предупредувањата се јасни – останува прашањето дали конечно ќе се преземат конкретни чекори или ќе чекаме следната надојдена вода да нè потсети на истото.
