Додека граѓаните со право очекуваат вистински инвестиции и решенија за здравството, денес сведочевме на уште една прес-конференција и фото-сесија за работа што требало одамна да биде редовно одржување.
Министерот за здравство Азир Алиу и градоначалникот на Општина Кочани Влатко Грозданов одржаа прес-конференција во дворот на Општа болница Кочани, каде како „активност“ беше презентирано кастрење гранки и расчистување вегетација.
Според најавите, се расчистува обраснатата вегетација, се уредуваат зелени површини и се отвора простор за неколку нови паркинг-места во болничкиот круг. Дополнително, било поправено и јавното осветлување кое подолг период не функционирало.
Но граѓаните со право прашуваат:
Дали за кастрење гранки и основно одржување на болнички двор навистина е потребна прес-конференција на министерот и градоначалникот?
Во време кога здравствениот систем се соочува со сериозни проблеми – недостиг на кадар, опрема и големи инвестиции – ваквите настапи оставаат впечаток дека се прави политички маркетинг од активности кои треба да бидат нормално и редовно одржување.
Граѓаните очекуваат вистински реформи, подобри услови за лекување и конкретни вложувања во здравството – а не прес-конференции за косење трева и кастрење гранки.
